چنلی بئل سایی 4 شعرلریندن:
سئوگيلي لر گونو
اسماعيل جميلی
سئوگيلي لر گونونده يم سئوگيليمدن اوزاقلاردا
آيريليغين الينده يم سئوينجلريم دوزاقلاردا
نه سن وارسان، نده آنام نه گول وارديـر، نده چيچک
يوللار اوزون عومور قيسسا آيريليغا دؤزمور اوره ک
بوردا اسمير پنجره مدن ساوالانيــن ايليـق يئـلي
بوردا آلميــر درد غمي گؤزلرينيـن سئـوگي سئـلي
خاطيره لـر دفتري ديـر دولانديغين يئــرلر منسيز
آيريليغيـن غزليـدير سنسيز، منسيـز قالان تبريـز
وقتسيز خزان اسدي بيزه گؤروش يئـري تالان اولدو
ايسته ييميز ياد اللرده دوستاق اولدو، قالان اولدو
سئوگيليلر آيري دوشدو وصال چاغين هيجران آلدي
ايلک باهارا اومودلانـان باغ باغچاني خزان آلدي
آرزي دولو اؤره ييميـز اولدو يئنه غم چاناغي
توي گؤزله ين آناميزين گولمز اولـدو گول دوداغي
سئوه نلري آيري سالان يارامازا قارغيش اولسون
آيريليغا باش ايمه ين سئوه نلره آلقيش اولسون.
