منت دارليق و آچیقلاما

هر شئي دن اؤنجه بوتون دوستلاري، فيكيرداشلاري و آذربايجان ميلتيني سالام لايير و سايقي لاريمي بيلديريرم.  بيلديينيز كيمي گئچن ايل 21 فوريه (2 اسفند) دونياليق آنا ديلي گونو توتوقلانديم و 27 گوندن سونرا 40 ميليون وثيقه ايله آزادليغا بوراخيلديم، 25 ارديبهشت ده اورمو انقلاب محكمه سي بيرينجي شعبه ده (عضويت در گروههاي تجزيه طلب و قوميت گراي آذربايجان و تلاش جهت تجزيه ارضي كشور و اقدام عليه امنيت ملي موضوع ماده 499 قانون مجازات اسلامي) سوچلاري ايله محاكمه اولوندوم، بو سوچلارين بلگه سيز اولدوغونا گؤره و ديرلي وكيليمين چابالاري نتيجه سينده بو سوچلاردان تبرئه اولدوم اما محكمه مني (فعاليت تبليغي به نفع گروههاي ضد نظام موضوع ماده 500 قانون مجازات اسلامي) سوچو ايله 8 آي زيندانا كي 3 ايل مددتينده تعليق اولوناجاقدير، محكوم ائتدي. بو آرادا بير ژورناليست كيمي يازيلاريمي كسمه ديم اما كؤنول ايسته مييه رك بو وبلاگي يئني لشديره مديم. سون دفعه كي بو وبلاگي آبديت ائتديم ائله هامان 2 اسفند 1386 دي. ايندي و بو گوندن يئنه ده چنلي بئل وبلاگي يئني لشه جكدير. بو آرادا ايسته رديم بوتون او دوستلار و فيكير داشلارا كي من دوستاقداكن و يا آزادليغا بوراخيلاندان سونرا چابالاري ايله و خبرلشمه لرايله مني يالنيز بوراخماديلار سايقي لار و منت دارليقلاريمي بيلديرم، او جومله دن كميته حقوق بشر آذربايجان جنوبي – ADAPP – (اؤزليكله بؤيوك رسول اوغلو)، كميته دفاع از زندانيان سياسي آذربايجان - آسمك (اؤزليكله فاخته زماني و عليرضا جوانبخت قولونجو جنابلاري)، آذبيلتوپ (مجمع دانشگاهيان آذربايجاني)، كانون نشريات دانشجويي آذربايجان، اؤيرنجي سيته سي و باشقا وب سيته لري، سولدوز پيام نور بيليم يوردو اؤيرنجي لري و باشقلاري و بير چوخ دوستلار و فيكيرداشلاردان كي اؤزلرين تهله كه يه سالاراق مني اونوتماميش لار تشكور ائديب سايقي لاريمي بيلديريرم. بو آرادا من هله دوستاق داكن و آزادليغا بوراخيلاندان بري بير نئچه شخص ساريندان آغير اتهاملارا و تخريب لره معروض قالديم، او تخريب لر كي تانينميش بير نئچه دولانديريجي شخص لر كي ايشلري ميلي فعالاري تخريب ائتمك دير و دوغرودان دا بو يولدا چوخ زنگين دوسيايا ماليك ديلر آرايا گلميشدير. هر حالدا ميلي منافع لريميز اوغروندا و آذربايجانين بير نئچه تانينميش و ديرلي فعالاري و فيكيرداشلاريميزين ايسته يي ايله او تخريب لرين قارشيندا يالنيز "زامان هرنه يي معلوم ائده جك" اومودايله اونلاري جاوابلاماديم، و دوغروداندا زامان هرنه يي معلوم ائده جك. آنا ديليمدن مدافعه ائتمك اوچون توتوقلانديقيما گؤره آذربايجانين ديرلي اوستادي و اؤندري اولان رحمتليك پروفسور محمد تقي زهتابي نين شعري ايله چنلي بئل وبلاگي يئني دن ايشه باشلايير.    

  سو” دئییبدیر منه اولده،آنام “آب” کی، یوخ!

“یوخو”اویرتدی اوشاقلیقدامنه،”خواب” کی،یوخ

ایلک دفعه کی،”چورک”وئردی منه “نان” دئمه دی

 ازلیندن منه “دوزدانه”، “نمکدان” دئمه دی

آنام ،”اختر” دئمه یبدیرمنه،”اولدوز “دئییب او

 سو دوناندا،دئمه ییب “یخ”دی بالا،”بوز”دئییب او

 “قار” دئییب ،”برف” دئمه ییب،”دست” دئمه ییب”ال”دئییب او

منه هئچواخت “بیا” سویله مه ییب،”گل”دئییب او

 یاخشی خاطیرلاییرام، یاز گونو آخشام چاغی لار

باغچانین گون باتانیندا کی، ایلیق گون یاییلار

 گل: ديیه ردی، داراییم باشیوی ای نازلی بالام!

 گلمه سن گر، باجی يین آستاجا زولفون دارارام

 او دئمه زدی کی ،”بیا شانه زنم بر سر تو”

 “گر نیایی بزنم شانه سر خواهر تو”

 بلی، داش یاغسادا گویدن، سن اوسان منده بویام

 وار سنین باشقا آنان، واردی منیم باشقا آنام

 اوزومه مخصوص اولان باشقا ائلیم واردی منیم

 ائلیمه مخصوص اولان باشقا دیلیم واردی منیم

 ایسته سن قارداش اولاق ،بیر یاشایاق، بیرلیک ائدک

وئریبن قول-قولا، بوندان سورا بیر یولدا گئدک

 اولا، اوزگه کولک لرله گرک آخمایاسان

 ثانیا، وارلیغیما، خالقیما خور باخمایاسان

 یوخسا گر زور ديیه سن ملتیمی خوار ائده سن

 گون گلر، صفحه چونر، مجبور اولارسان گئده سن.